ស្រីលង្កា៖ ស្រីលង្កានឹងចាប់ផ្តើមការចរចាឡើងវិញលើកិច្ចព្រមព្រៀងពាណិជ្ជកម្មរបស់ខ្លួនជាមួយប្រទេសឥណ្ឌា ចិន និងថៃ ក្រោយពីផ្អាកកិច្ចការពាណិជ្ជកម្មជាងបួនឆ្នាំកន្លងមក ស្របពេលដែលប្រទេសរងគ្រោះដោយវិបត្តិសេដ្ឋកិច្ចមួយនេះ សម្លឹងរកឱកាសក្នុងការកសាង និងងើបឡើងវិញនៃវិស័យសេដ្ឋកិច្ចក្នុងប្រទេសរបស់ខ្លួនឡើងវិញ។

ប្រទេសដែនកោះដែលមានប្រជាជនប្រមាណ ២២លាននាក់នេះ បានជួបប្រទះវិបត្តិហិរញ្ញវត្ថុដ៏អាក្រក់មួយ និងមិនធ្លាប់មានក្នុងរយៈពេលជាង ៧០ឆ្នាំចុងក្រោយ ដែលបណ្តាលមកពីកង្វះទុនរូបិយបណ្ណបរទេសសម្រាប់កិច្ចការពាណិជ្ជកម្ម នាំឱ្យប្រជាជនជួបប្រទះបញ្ហាកង្វះប្រេងសាំង ម្ហូបអាហារ និងថ្នាំសង្កូវជាអាទិ៍។

មន្រ្តីពាណិជ្ជកម្មរបស់ថៃ ត្រូវបានគេរំពឹងថានឹងមកដល់ប្រទេសស្រីលង្កានាថ្ងៃចន្ទ ដើម្បីចរចាលើកិច្ចព្រមព្រៀងពាណិជ្ជកម្មដែលបានផ្អាកតាំងពីឆ្នាំ២០១៨។ កិច្ចចរចាផ្នែកពាណិជ្ជកម្មជាមួយប្រទេសឥណ្ឌា ចិន និងថៃ ដែលជាដៃគូពាណិជ្ជកម្មដ៏ធំបំផុតរបស់ប្រទេសស្រីលង្កាដែលមានទឹកប្រាក់ប្រហែល ៥ពាន់លានដុល្លារអាមេរិកក្នុងពាណិជ្ជកម្មទ្វេភាគីក្នុងឆ្នាំ២០២១ ត្រូវបានគេរំពឹងថានឹងចាប់ផ្តើមនៅក្នុងខែកុម្ភៈ និងខែមីនាខាងមុខ។

គួរបញ្ជាក់ថា កិច្ចសហការពាណិជ្ជកម្មរវាងស្រីលង្កា និងថៃ មានទំហំប្រមាណជា ៤៦០លានដុល្លារអាមេរិកកាលពីឆ្នាំ២០២១ នេះបើយោងតាមទិន្នន័យពីធនាគារកណ្តាលស្រីលង្កា។ ដោយឡែក កិច្ចពិភាក្សាពាណិជ្ជកម្មរវាងស្រីលង្កា ជាមួយចិន និងឥណ្ឌាវិញ ក៏មានភាពវិជ្ជមានខ្ពស់ផងដែរ ប៉ុន្តែនៅមិនទាន់មានការកំណត់កាលបរិច្ឆេទជាក់លាក់ណាមួយនៅឡើយទេ។

ពាក់ព័ន្ធនឹងព័ត៌មានបន្ថែមជុំវិញកិច្ចព្រមព្រៀងពាណិជ្ជកម្មណាមួយនោះ ក្រសួងពាណិជ្ជកម្មឥណ្ឌា និងក្រសួងការបរទេសចិន មិនទាន់មានការអត្ថាធិប្បាយណាមួយបន្ថែមឡើយ៕